Mga nag-riot sa Maynila, binanatan ni Isko

“Utak adik, utak talangka.” Ganiyan inilarawan ni Manila Mayor Isko Moreno ang mga nanggulo sa dapat na mapayapang protesta sa Recto Avenue kahapon, Setyembre 21. Pahayag ng alkalde, matapang lamang ang mga ito kapag sama-sama na silang lahat. “Itong mga tolongges na kabataan, pagdating ng lilim ng gabi, nag-mob na. As you can see, maraming public at private property were damaged,” ani Moreno. Aniya, duda raw siyang tunay na raliyista ang mga sangkot sa gulo sa Recto dahil may kani-kaniyang lugar ang mga nakatakdang mag-rally nitong Linggo. “Ang initial report namin, merong nagmanipulate nung mga bata, unconfirmed pa. Ito ‘yung mga nagsunog ng mga motor, naghagis ng molotov, [at] nanira ng private property,’ dagdag pa niya. Samantala, hindi bababa sa 100 ang nasa kustodiya ng Manila Police District (MPD) kabilang ang 48 na menor de edad na kanilang inaresto.